ڕۆژنووسی فه‌ردین مه‌زهه‌رپوور

میلله‌تێکی سه‌یرین !

نویسنده:
۲ آبان ۹۳

■ ئێمه میلله‌تێکی زۆر سه‌یرین ! به ڕۆژ دێینه سه‌ر شه‌قام و پشتگیری له کۆبانێ ئه‌که‌ین و هه‌ر چی تف و له‌عنه‌ت شک ئه‌به‌ین ئه‌یده‌ین به ناو چاوی ئه‌ردۆغانا ! پاشان که دڵمان ئارامی گرت ، ئیتر هه‌ست به برسیه‌تی ئه‌که‌ین و ئه‌چینه ” ترک دنر ” نانی نیوه‌ڕۆمان ئه‌خۆین ! به ده‌م چوونه ماڵیشه‌وه له ” قنادی آذربایجان ” دا بۆ میوانیه‌که‌‌ی شه‌ومان شیرینی ئه‌سێنین و یه‌ک سه‌عاتیش له سه‌فی ” بستنی نعمت ” دا سه‌رقاڵی گێڕانه‌و‌‌ه‌ی حه‌ماسه‌ته‌که‌ی ئه‌و ڕۆژه ئه‌بین !

■■ ئێمه میلله‌تێکی زۆر سه‌یرین ! به شه‌و به دیار کاناڵه‌کانه‌وه دائه‌نیشین ، هه‌تا باسی حه‌ماسه‌تی ئه‌و ڕۆژه‌مان بۆ بگێڕنه‌وه . پاشان به دڵێکی پڕ له غروره‌وه ، وه‌ک کوردێکی ته‌واو شانی لێ شل ئه‌که‌ین و هه‌تا نیوه‌شه‌و ، به ته‌ماشا کردنی سریاڵی تورکی و … ماندوویه‌تیمان ئه‌حه‌سێته‌وه !

ئه‌وه‌ی ئه‌کوژرێت کورده ، ئه‌وه‌یش وا ئه‌کوژێت هه‌ر کورده !

نویسنده:
۲۲ مهر ۹۳

” حزب الله ” ی کوردی ، ساڵی ۱۹۷۹ له شاری باتمان ، له لایه‌ن ” حسین ولی‌اغلو ” وه دامزرا . لێره نامه‌وێ له سه‌ر مێژوی ئه‌م ڕێکخراوه قسه بکه‌م . ته‌نیا ئه‌وه‌تان به بیر دێنمه‌وه که ئه‌م ڕێکخراوه ، گروپێکی جیهادیه و له سه‌ره‌تای دامه‌زراندنیه‌وه تا کۆتایی ساڵانی ۹۰ دژ به پ ک ک له چالاکیا بووه . دوا به دوای چه‌ندین کاری تیرۆریستی ، له ساڵی ۲۰۰۰ ، ولی‌اغلو له شاری ئه‌سته‌مبوڵ کوژرا و نزیک به ۱۰۰۰ که‌س له لاینگرانی ده‌ستگیر کران . نزیک به ۹۰ له ۱۰۰ ی لاینگر و ئه‌ندامانی ئه‌م ڕێکخراوه به داخه‌وه کوردن . له کاتی دامه‌زراندنیه‌وه تا ئیستا ، پێچه‌وانه‌ی پانتایی سیاسی تورکیه ، که بوونێکی زه‌ق و به‌ر چاویان نه‌بووه ، له نێو کۆمه‌ڵگای کوردی باکوور ، بونی ڕۆحی‌یان بووه‌و هه‌یانه . ڕژیمه یه‌ک له دوای یه‌که‌‌‌کانی تورکیه‌ش ، له سه‌رده‌می سکۆلاره‌کانه‌وه ، هه‌تا سه‌رده‌می ئیخوانه‌کان ، حه‌زیان له چاره‌ی حزب الله نه‌کردووه . به‌ڵام ئه‌م ڕیکخراوه توندڕه‌وه‌یان له ژێر سایه‌ی ڕه‌حمه‌تی خۆیانا بۆ کاتی ته‌نگانه پاراستووه و نه‌یان هێشتووه له ناو بچێت ! ئه‌ویش ته‌نیا و ته‌نیا له به‌ر لاواز کردنی بزوتنه‌وه‌ی کوردی بووه له باکوور ، که پ ک ک ڕابه‌رایه‌تی ئه‌کات . به‌ڵگه‌ش بۆ ئه‌مه شکستی ” ده‌میرتاش ” ه له هه‌ڵبژاردنه‌کانی سه‌رۆکایه‌تی تورکیه ، که ته‌نیا ۱۰ له ۱۰۰ ی ده‌نگه‌کانی به ده‌ست هێنا ! ئه‌مه نیشان له پلانێکی به هێزه بۆ دزه پێ کردنی ئایدۆلۆژیای ئیخوان و ” گویله‌ن ” و ” حزب الله “‌ی کوردی بۆ نێو بیر و هزری کوردی باکور ، تا وا تێ بگه‌ن که به‌رهه‌ڵستی کردنی پ ک ک و ب د پ و هه‌ر هێزێکی کوردی که دژ به ئانکارا بێت نیشان له دینداری و موسڵمانه‌تیه ! هۆکاره‌کانی ئه‌م دزه کردنه‌ش زۆرن ، ڕه‌نگه یه‌کێ له هۆکاره‌کان مانیفێستی چه‌پ و شێوه خه‌باتی پ ک ک بێت ، یان هه‌ڵه‌گه‌لێکی مێژوویی که بۆی هه‌یه هه‌ر ڕێکخراوێک له ته‌مه‌نی خۆیا کردبێتی . به‌ڵام هیچ کام له‌مانه ناتوانێت ئه‌وه بشارێته‌وه که به داخه‌وه کوردی باکوور به ناوی دینه‌وه دوچاری دوگمێکی ئایینی بووه و له دوگماتیزمی دینی ئه‌وه‌نده غه‌رقه ، که بوونی خۆی فیدای ئایدۆلۆژیای ئیخوان و ئه‌ردۆغان ئه‌کات . ئه‌م دوگم بوونه‌ش وای کردووه که ئیخوانه‌کانی رۆژهه‌ڵات و باشووریش ته‌نیا و ته‌نیا له به‌ر ئه‌وه‌ی که هاو فکری حزبه‌که‌ی ئه‌ردۆغانن ، چاو به سه‌ر فاشیست بوونی حکومه‌ت و ده‌وڵه‌تی تورکیه ببه‌ستن و وه‌ک پاشکۆیکی ئیخوانه‌کانی تورکیه به شانازیه‌وه به شان و باڵیانا هه‌ڵ بده‌ن‌‌و خۆیان له ڕه‌گه‌ز په‌ره‌ستی و فاشیست بوونی ده‌سه‌ڵاتدارانی تورکیه گێل بکه‌ن .

دوا به دوای شه‌هید بوونی زیاتر له ۳۵ که‌س له شاره‌کانی باکوری کوردستانا ، ئه‌ردۆغان ئه‌ڵێ :” ئه‌وه‌ی ئه‌کوژرێت کورده ، ئه‌وه‌یش وا ئه‌کوژێت هه‌ر کورده “

منیش له گه‌ڵی هاوڕام ؛ ئه‌وه‌ی وا ئه‌کوژێت ، لاینگرانی گویله‌ن و حزب الله ی کوردی و ئیخوانه‌کان و ئه‌وه‌ی وا ئه‌کوژرێتیش ڕه‌نگه کوڕی ماڵی هاوسێ‌یکی لاینگری گویله‌ن و حزب الله‌ی کوردی و ئیخوانه‌کان بێت !

ئه‌ردۆغان خۆی به زمانی خۆی مانیفێستی خۆی ئاشکرا ئه‌کات ؛ کوشتنی کورد به ده‌ستی کورد! ….

داوه‌حش !

نویسنده:
۲۰ مهر ۹۳

ئه‌مڕۆ له شه‌ڕێکی ناوچه‌ی ڕه‌شاد چه‌ند داوه‌حشێک کوژران و یه‌کێکیان به برینداریش که‌وتۆته ده‌ست هێزه‌کانی پێشمه‌رگه … یه‌کێ له کوژراوه‌کان و ئه‌و برینداره‌ش که به دیل گیراوه خه‌ڵکی ئاڵمانن !!!    ///    کابرای له که‌ر که‌رتر نازانم چی که‌م بووه !؟ ئاڵمان و به‌هه‌شت ئه‌بێ فه‌رقیان چی بێت !؟ ئه‌وه نیه حۆری و شه‌ڕاب ئه‌نته‌هووریش له ئاڵمان هه‌یه …کورد ئه‌ڵێ ؛ ئه‌وه‌ی بۆ گوو که‌ر هه‌ڵ ئه‌که‌وێت ، با بۆ ڕاوچی هه‌ڵ که‌وێت !

شه‌ڕی کوردی !

نویسنده:
۲۴ مرداد ۹۳

من تێ ناگه‌م ئه‌مه چه شه‌ڕێکه که وا به ڕۆژی ڕۆشنا داعشیه‌کان له به‌ر ده‌م هێزی پێشمه‌رگه خه‌ریکی سه‌نگه‌ر لێدانن و پێشمه‌رگه‌و په‌یامنێری کاناڵه کوردی‌یه‌کان ماندوو نه‌بوونیان ئه‌که‌ن ! شه‌ڕ ئه‌گه‌ر شه‌ڕ بێ ، ئه‌بێ سێبه‌ری یه‌کتر به تیر لێ بده‌ن ! هه‌ر چی بیری لێ ئه‌که‌مه‌وه ئه‌مه له هه‌ر چی شته ئه‌چێ ئیلا شه‌ڕ نه‌بێت ! ئه‌م ماسته موویکی تێدایه ! ( بۆ ئاگادرای ؛ ئه‌و که‌سانه‌ وا حه‌ز ئه‌که‌ن بزانن شه‌ڕی کوردی چۆنه با سه‌یری ئه‌م لینکه بکه‌ن ! )

سه‌وز و زه‌ررد و شین و …

نویسنده:
۲۰ مرداد ۹۳

له گرتنه‌وه‌ی مخمووردا مه‌لا به‌ختیار ئه‌ڵێ : ده‌ست که‌وته‌کان به حیزبی مه‌که‌ن !!! /// به‌ڵام له دیمه‌نه‌کانی کوردساته‌وه پێشمـه‌رگه‌کانی یه‌کیه‌تی ته‌نیا به ئاڵای سه‌وزه‌وه ئه‌ڕۆنه ناو مه‌خموور !! کاتێ ئاڵای ڕه‌شی داعشیش له سه‌ر سیلۆی مه‌خموور دائه‌گرن ، ئالای سه‌وز له جێگه‌ی هه‌ڵ ئه‌واسن !! ئه‌مانه نه یه‌ک جار به‌ڵکوو له ئێواره‌وه چه‌ند جار دووباره له کوردساته‌وه په‌خش کرا … … داعش وه‌ک هه‌ڕه‌مه گوڵجار وایه ! هه‌ر که‌سه‌و خه‌ڵکی شوێنێکه ، به‌ڵام کابرای چیچانی و ئه‌ڵمانی و تونسی و تورکیایی بۆ ئالای ڕه‌شی داعش یه‌ک هه‌ڵوێستن و هه‌ر کامیان ده‌سه‌ سڕی تووالێتی باوکی له گه‌ڵ خۆی نه‌هێناوه که بڕواته هه‌ر کوێ بیکا به له‌قێ دارا و هه‌ڵی واسێ!!!

بانێکو دوو هه‌وا …

نویسنده:
۱۶ مرداد ۹۳

ناسراوێکم هه‌بوو له‌ فه‌یسبووک ، مه‌گه‌ر هه‌ر خۆی و خوای خۆی بزانن که له سه‌ر ئاڵۆزیه‌کانی میسر و له‌م دوواییه‌ش غه‌زه چی ئه‌نووسی و چه‌نده‌ها کاریکاتۆری سیسی و ناتانیاهو و ئۆباماو … دائه‌نا و خۆی بۆ ئه‌و عه‌ره‌به خوێڕیانه‌ی میسر و غه‌زه جیڕ ئه‌کرده‌وه . به‌ڵام له ئاست کوبانێ خۆی که‌ڕ کردبوو ، هه‌ر وه‌ک له گوێ‌ی گادا خه‌وتبێت ! ئه‌و کات ۲۴ ساعه‌ته له سه‌ر خه‌ت بوو ، به‌ڵام ئێستا له ئاست ڕووداوه‌کانی کوردستان و هێرشی چه‌ته‌کانی داعشی هاو فکر و بیر و ڕای بۆ سه‌ر کوردستان لاڵ بووه . بتکه‌م به قوربانی خاکی به‌ر پێ‌ی کوردێکی ئێزدی . ده‌ک داوه‌شیت ، قیزم لێت ئه‌بێته‌وه خوێڕی ی ی . .

هه‌ڵه‌بجه

نویسنده:
۵ مرداد ۹۳

هه‌ڵه‌بجه هه‌ر له سه‌ره‌تای دروست بوونی هه‌تا ئێستا لانکه‌ی شێعر و شاعیران بووه ، به شاری شێعر و جوانی ناو بانگی ده‌ر کردووه .. گۆران ، تاهێر به‌گ و ئه‌حمه‌د موختار و …  . زێدی ئه‌ده‌بی کلاسیک و نوێی کوردییه . خاوه‌‌ن مێژوویکی به هێزه له خه‌بات و خاوه‌ن برینێکی نه‌ته‌وه‌ییه . به داخه‌و ئێستا له ڕاگه‌یاندنه‌ کوردیه‌کانه‌وه ئه‌وه ئه‌بیسیت که ڕۆژانه ، گه‌نج و لاوی هه‌ڵه‌بجه ئه‌ڕۆنه سووریا و به ناوی جیهاد و شه‌هاده‌ته‌وه له پێناو بۆگه‌نترین ڕێکخراوه‌ی تیرۆریستی جیهان ، دژ به نه‌ته‌وه‌ی خۆیان و دژ به مرۆڤایه‌تی ، ژیانیان به‌خت ئه‌که‌ن . ئه‌مه‌ش بۆ بۆشایی ده‌سه‌ڵات و قانوون ئه‌گه‌ڕێته‌وه که له باشووری کوردستاندا هه‌یه ، که کارێکی وای کردووه هێزه ئیسلامیه تووندڕه‌وه‌کان به ئازادی خاوه‌ن حیزب و ته‌له‌فزیۆن و راگه‌یاندن بن . هانی خه‌ڵک به‌ن بۆ تیرۆر ، ته‌نانه‌ت مینبه‌ری مزگه‌وته‌کان بۆ ئه‌و کاره گڵاوو دژه مرۆڤایه‌تییه به کار بهێنن . حه‌یفه هه‌ڵه‌بجه له شاری شێعر و جوانی و له شاری شاعیرانه‌وه ببێ به شاری تیرۆر و تیرۆرێستان …

که‌چه‌ڵ

نویسنده:
۲۶ فروردین ۹۳

یه‌که‌م : کۆمه‌ڵگای ئێمه ئه‌بێ تا چه ئه‌ندازه به دووای قاره‌مانه‌کانا وه‌یلان بێت که تراشینی سه‌رێک – جا به هه‌ر هۆکارێک ! – ببێته مایه‌ی باس و مشت و مڕی ڕۆژانه‌ی هه‌ر تاکێکی ئه‌و کۆمه‌ڵگایه !؟ قار‌ه‌مان په‌روه‌ری و قاره‌مان په‌ره‌ستی هه‌میشه له‌و کۆمه‌ڵگایانه ڕوو  ئه‌دات که تاکه‌کان خۆیان ناتووانن له ئاست کێشه‌کان به‌رپرس بن و هه‌وڵی جدی بۆ ڕه‌وینه‌وه‌ی گیر و گرفته‌کان به‌ن ! جا هه‌ر ئه‌وانه‌ی وا چه‌پڵه و فیکه بۆ قاره‌مانه‌کان لێ‌ئه‌ده‌ن و ئه‌کێشن ، خۆیان ئه‌بنه مایه‌ی شکست و دڵ ساردی قاره‌مانه‌که‌ن !

دووه‌م : ئیمڕۆ که‌سێک ئه‌وی ووت ؛ گوایه سی نه‌فه‌ر له پارله‌مانتارانی پارله‌مانی فه‌ڕانسه قژی سه‌ریان تاشیوه ! یه‌کێکیتر ئه‌ی ووت ؛ گوایه ” فڵانی ” سه‌یاره‌یکی ئاخر مۆدێلی بۆ ناردووه ، دانه‌یکیتر ئه‌ی ووت له فڵان شارا ئه‌ونه‌ قه‌واره زه‌مینیان پێ به‌خشیوه ! … هتد . دووای کاره‌که‌ی ئاغای ” علی محمدیان ” ، فارس ووته‌نی ؛ ” حواشی ” ئه‌م کاره ئه‌ونه زۆر بوو که که‌م که‌م نه‌فسی کاره‌که چووه نێو که‌وانه‌ی پرسیار و تا ڕاده‌یک بێ‌تام بوون ! هه‌ر تاکێکی ئه‌م کۆمه‌ڵگایه باشتر وایه دووای ده‌س خۆشی کردن له‌و کاره جووانه ،  به جێی سه‌رتاشین و باس کردن له‌و جۆره شایعاته هه‌وڵ بات که کارێکی له‌وه جوانتر و عه‌مه‌ڵیتر بکات .

خوایا وه‌ته‌ن ئاوا که‌ی …

نویسنده:
۱۹ اسفند ۹۲

ته‌نیا به بیانووی ئه‌و مشت و مڕ و سه‌ر ئێشانه‌ی دوای مردنی پاشایی !!!
————————————————————————————
خوایه وه‌ته‌ن ئاواکه‌ی …
****************
نازانم چه‌ند ساڵم بوو که سروودی ” خوایا وه‌ته‌ن ئاوا که‌ی ” یان به گوێ‌و به ناخ‌و به ڕۆحما چرپاند . ئه‌م ئاوازه‌م به لاوه زۆر خۆش بوو ، بۆیه ئێستاش هه‌ر وه‌ک مناڵیم زۆربه‌ی کاته‌کان له گه‌ڵ خۆما ئه‌یڵێمه‌وه . ” وائه‌زانم له بارودۆخی ئێستادا باشتره دایک و باوک ومامۆستا و دایه‌نی باخچه‌کان ، له پاڵ سروود و ئاوازه فارسییه بێ تامه‌کانی باخچه‌ی ساوایان که به پلان و به‌رنامه‌ی پێش وه‌خت ، به ناڕه‌وا به کۆرپه‌و مناڵانی کوردی فێر ئه‌که‌ن ، ئه‌م گۆرانییه خۆش‌و به تامه فێری مناڵه‌کان بکه‌ن تا نه‌وه‌ی داهاتوویش هه‌میشه خولیای گۆرانی و ئاواز و هونه‌ری کوردی بێت و خه‌می پاراستن و ئاوه‌دانی‌ و ئاوه‌دان کردنه‌وه‌ی وه‌ته‌نیان له دڵا بێت .

لینکی داگرتنی ئه‌م سرووده خۆشه

پـایـیز بـه‌خێر بێت . .

نویسنده:
۲۲ دی ۹۲

ئــه‌ی وه‌تـه‌ن! پـایـیز بـه‌خێر بێت ، چونکه‌ ئێستا باوومه‌
گه‌رم و ساردی فه‌سڵه‌که‌ت عه‌ینه‌ن دڵه‌ی شێواوومه‌
——————————————————-
■ له مله‌ی ژاڵانه‌وه‌و ، به‌ره‌و هه‌ورامانی ته‌خت
پاییزی ۹۲ ی هه‌تاوی

Page 3 of 512345