ڕۆژنووسی فه‌ردین مه‌زهه‌رپوور

کتێب

نویسنده:
۸ دی ۹۶

زۆر جار کتێبێکم سه‌ندووه ، که‌چی بە دیاری دراوە به که‌سێکیتر و ئەویش فرۆشتوویەتییەوە! زۆر کتێبم بینیوه کە تارێخ و یادەوەری و ئیمزای کەسیتری بەسەرەوەیە و بە دیاری داویەتی بە هاوڕێی یان دۆستێکی ؛ که‌چی ئه‌ویش له بازاڕ هه‌ڕاجی کردووه !!! بێچاره نووسه‌ر و داماو ئه‌و که‌سه‌ی وا کتێب خه‌ڵاتی ئه‌م جۆره که‌سانه ئه‌که‌ن ….

یەکەم درۆ . . .

نویسنده:
۵ دی ۹۶

من یەکەم ڕۆژی چوونە قوتابخانەم له بیرە، مامۆستاکان تێکڕا هەموویان یەک جۆر درۆیان دووبارە ئەکردەوە! ئێستا ۳۵ ساڵ بەسەر گەورەترین درۆکانی ئەواندا تێ ئەپەڕێت. ئەوان ووتیان: ئێوە نەوەی دووا ڕۆژن و وڵات ئەکەوێتە دەست ئێوە! دووا ڕۆژ هات و ڕۆیشت ؛ ئێمە تەنیا قەبارەمان گەورەتربوو ، تووڕەتر و ناڕازیتر بووین و نائومێدتر . . .
خۆزگە مامۆستاکانمان بوێرتر و ڕاستگۆتر بوواین لەگەڵمان ، خۆزگە بەڕاستگۆیی و بوێریەوە بیانگوتایە وڵات ئەکەوێتە دەست کێ؟! تا ئێمە لەم (سەحرای تەتەران)ە هێندە چاوەڕێ نەبوواین!!

ڕیچ و شێخ مه‌عروفی نودێ

نویسنده:
۴ دی ۹۶

کلۆدیۆس جیمز ڕیچ کە گەشتەکەی سلێمانی و باشووری کوردستان تەواو ئەکات ، بەیانییەکی زوو لەکاتی گەڕانەوەیدا بەرەو بەغداد ئه‌ڵێت: نامەیەکم لە یەکێک لە پیاوە ئاینییەکانی سلێمانییەوە بەدەست گه‌یشت . ئه‌و پیاوه‌ ئاینییه‌ شێخ مەعروفی نۆدێییە . ( باوکی کاک ئەحمەدی شێخی گەورەی سلێمانی ) . ئه‌ڵبه‌ت به‌ پێی قسه‌ی ڕیچ ، شێخ مەعروف خارشت و حەساسیەتی پێستی هەبووە . داوای ئه‌وه‌ له‌ مسته‌ر ڕیچ ئه‌کات که‌ دەرمانێکی پێ بدات تا چاک ببێته‌وه .

ئه‌وه‌ی جێگای سه‌رنج و تێڕامانه که شێخ مەعروف نەیتوانیوە حەساسیەتی پێستی خۆی چارەسەر بکات ، کەچی هەتا ئێستاش خەڵک دەچنە سەر مەزارەکەی و داوای چاک بوونەوەی نەخۆش و عیلاجی نەزۆکی و ئازار و شیفای شێت و دەستوەشاندن و هتدی لێ ئەکەن . نەک هەر لەو ، زۆرتریش لە کاک ئەحمەدی شێخی کوڕیشی داوا ئه‌کەن!!

مه‌لا عه‌لی که‌ڵه‌ک

نویسنده:
۳ دی ۹۶

شه‌وی هه‌ینی کاناڵی … له ڕاپۆرتێکدا مه‌ته‌به‌که‌ی مه‌لا عه‌لی که‌ڵه‌کیان به سه‌ر کرده‌وه ! له ڕاپۆرته‌که‌دا جه‌نابی مه‌لا عه‌لی که‌ڵه‌ک داعیه‌ی چاره‌سه‌ری نه‌خۆشی ” ئێبۆلا ” و ” ئه‌یدز “ی کرد !!! ئه‌وانه‌ی وا سریاڵی ” قاوه‌ی تاڵ ” یان بینیبێت ، کاراکتێری ” نباتی ” یان له یاده . حه‌کیمێک که بۆ هه‌ر نه‌خۆشیه‌ک نه‌باتی به چاره‌سه‌ر دائه‌ناو به پێی جۆری نه‌خۆشیه‌که ، ڕاده و ڕێژه‌ی نه‌باتی که‌م و زیاد ئه‌کرد !!! به واتایکیتر بۆ هه‌موو نه‌خۆشیێک ته‌نیا نه‌بات داغی ئه‌نواند! ئێستاش دکتۆر عه‌لی بۆ هه‌ر نه‌خۆشیێک ته‌نیا میزی حوشتر ئه‌نوێنێ ! به‌لام ڕێژه‌ و ڕاده‌ و کاتی خواردنه‌وه‌ی بۆ چاره‌سه‌ری نه‌خۆشیێک له گه‌ڵ نه‌خۆشیێکتردا جیاوازه . بۆ نموونه بۆ ئه‌یدز ئه‌بێ شه‌و کاتی خه‌وتن ، دوو پێک میزی حوشتری عه‌ره‌بی ! له گه‌ڵ یه‌ک پێک شیری هه‌مان حوشتر تێکه‌ل بکرێت و نۆش بکرێت . به‌ڵام بۆ ” ئێبۆلا ” سێ پێک میزی حوشتری عه‌ره‌بی و دوو پیک شیری هه‌مان حوشتر تێکه‌ڵ بکرێت و به‌یانیان ، به دڵی ناشتا هه‌ڵی به‌یت ! …
جیا له گاڵته‌و گه‌مه ، پێم وایه وه‌زاره‌تی ته‌ندوروستی هه‌رێم له هوشیار کردنه‌وه‌ی خه‌ڵک ، به تایبه‌ت چینی نه‌خوێنه‌وار ئه‌رکی خۆی جێ به جێ نه‌کردووه‌و به داخه‌و کاناڵه‌کانیش به شێوه‌ی ناڕاسته‌خۆ ڕێکلامی تایبه‌تی بۆ ئه‌که‌ن …
————————————————————
تێبینی : ئێستا له بازاڕه‌کانی هه‌رێمی کوردستان یه‌ک به‌رمیلی ۲۰ لیتری میزی حوشتری عه‌ره‌بی به ۲ میلیۆن دیناره . له یه‌ک به‌رمیل نه‌وت گرانتره !!!

” راوێژ ” بوو به ۹ ساڵه …

نویسنده:
۱ دی ۹۶

■ ته‌مه‌نی یه‌که‌م لاپه‌ڕه‌ی وێب بۆ ۲۵ ساڵ پێش ئێستا ئه‌گه‌ڕێته‌وه . ته‌مه‌نی یه‌که‌م بلاگی کوردیش بۆ نزیک به ۱۸ ساڵ پێش ئێستا. کاتی خۆی نووسین له دونیای وێبدا گه‌رم و گوڕێکی زۆری هه‌بوو . به داخه‌و به هاتنی فیس بوک خوێنه‌‌ر و بینه‌ری کورد یه‌کسر ده‌ستی له گه‌ڕان به دونیای وێبی کوردی به‌رداو وه‌ک ساحێب په‌یج له تۆڕه کۆمه‌ڵایه‌تیه‌کان ، به تایبه‌ت فیس بوک ، بووه خاوه‌ن بلاگێکی شه‌خسی . په‌یجێک که به داخه‌و زۆربه‌یان خاڵین له بابه‌تی به پێز و به سوود ! ئیتر خوێنه‌ر و بینه‌ری په‌یجه‌کان که‌متر بابه‌ته‌کان ئه‌خوێنه‌وه و ته‌نیا وێنه‌کان لایک ئه‌که‌ن ! بۆ نموونه ئه‌و ستاتووسانه وا وێنه‌یان له گه‌ڵا نییه که‌متر لایک ئه‌کرێن به نیسبه‌ت ئه‌و ستاتووسانه‌ی وا وێنه‌یان له گه‌ڵه !! هه‌ر چه‌ند ئه‌م بارودۆخه ئاوقه‌وی میلله‌تانی‌تریش بووه ، به‌ڵام به داخه‌و فیس بووک هه‌ر به ته‌واوی هه‌ره‌سی به دونیای وێبلاگ نووسی کوردی هێناو و کاولی کرد ! خوێنه‌ر و بینه‌ری کوردیش هێشتا به باشی ده‌رکی به گرنگی وێب نووسی نه‌کردبوو ، تا هات خۆی له گه‌ڵ دونیای وێبدا ڕێک بخات و که‌ڵکی لێ وه‌ر بگرێت ، تووشی په‌تای فیس بووک هات !!! به قسه‌ی پسپۆڕانی بواری وێب هیچ کات په‌یجه‌کانی فیس بووک نه‌یانتووانیوه و ناتووانن جێگای لاپه‌ڕه‌کانی وێب بگرنه‌وه ، خۆزگه ئێمه‌ی کوردیش ، وه‌ک گه‌لانی‌تری ئه‌م جیهانه ده‌رکمان به‌وه بکردایت که فیس بوک ناتووانێت جێگای نووسین له دونیای وێبدا بگرێته‌وه . با ئیتر له قافڵه‌ی وێبنووسی جیهانی دووا نه‌که‌وین !
■■ ده‌ستپێکی نووسینم له دونیای وێب بۆ ساڵی ۲۰۰۳ ئه‌گه‌ڕێته‌وه . ئه‌و کات له وێبلاگه‌کانی ” ڤه‌ژین ” و ” ژین ” ده‌ستم به نووسین کرد . یادی به خێر وه‌ک کرێچی وا بووم ! هه‌ر کات له لای خاوه‌ن ماڵ ( بلاگفا / میهن بلاگ / پرشین بلاگ / … ) ڕه‌زام تاڵ ئه‌بوو ، یه‌کسر ، بێ سێ و دوو ده‌رگای له سه‌ر دائه‌خستم و ناوماڵه‌که‌یشمی ( ئه‌رشیڤی نووسینه‌کانم ) به تاراج ئه‌برد ! ئه‌رشیڤی ئه‌و ساڵانه‌م له کیس چوون ! تا دووایی له ساڵی ۲۰۰۸ ، له ماڵی خۆم له سایتی راوێژ گرسامه‌وه ! هه‌ر چه‌ند له‌وێش دوو جار به‌ر هێرشی هه‌کێره‌کانی یمن و میسر که‌وتم و به پێ ئه‌وه‌ی ئێرانی بووم ، به‌ر ڕه‌حمه‌تی قین و بوغزیان ده‌رحه‌ق به برا فارسه‌ شێعه‌کانم ! که‌وتم و حیسابی فارسێکی شێعه‌ی ئێرانیان بۆ منیش کرد و منی کورد ، به ئاگری قین و بوغزی شه‌ڕی شێعه و سونه‌وه سووتام و ڕاوێژ له گه‌ڵ نزیک به هه‌زار سایتی ئێرانی که له سیستمی وۆردپرێس که‌ڵکمان وه‌ر ئه‌گرت به‌ر هێرشیان که‌و‌تین و هه‌ک کراین و ئه‌رشیڤی ئه‌و ساڵانه‌شم ته‌فروتوونا بوون ! ئه‌مڕۆ ڕاوێژ پێ ئه‌نێته ناو ۹ ساڵگیه‌وه ، به‌مانه‌وه ئێستاش له ڕاوێژ دووای ۸ ساڵ هه‌ر درێژه به نووسین ئه‌ده‌م ، ئه‌گه‌ر ته‌نیا خۆیشم خوێنه‌ری بابه‌ته‌کانم بم !

ماندێلا

نویسنده:
۳۰ آذر ۹۶

ئه‌مڕۆ بینه‌ری به‌رنامه‌یکی دکۆمێنتاری بووم له سه‌ر ژیان و خه‌باتی ” نێلسۆن ماندێلا ” . ئه‌م به‌رنامه‌یه بووه هه‌وێنی ئه‌م نووسینه :
” ماندێلا ” یش چوو . . جیهان له‌و جۆره که‌ڵه پیاوانه‌ی زۆر به خۆیه‌وه بینیوه . ” ماندێلا ” ئه‌و که‌سه‌ بوو که خه‌ونی به ئازادی و یه‌کسانی و ئاشتیه‌وه بینی و ، خه‌ونه‌کانیشی به دی هاتن . کاتێ مردیش ، جیهان به له ده‌ست دانی خه‌مبار بوو . له‌و باوه‌ڕه‌دام که که‌س نییه حاشا له‌وه بکات که گه‌وره بوونی ” ماندێلا ” و گه‌یشتنی به خه‌ونه‌کانی به هاوڕێیتیو پاڵپشتی ئه‌و خه‌ڵکانه‌وه بوو که وه‌ک کێو ، سه‌خت و قایم له پشتی وه‌ستان و هانده‌ری خه‌باتی بوون .
ئێمه‌ش که‌سانێکمان هه‌یه که ئه‌گه‌ر ئه‌و هه‌ل و مه‌رجه‌ی وا بۆ ” ماندێلا ” ڕه‌خسا ، بۆ ئه‌مانیش بڕه‌خسێو ، ئه‌و جه‌ماوه‌رو پاڵپشتانه وا ” ماندێلا ” بووی ، ئه‌مانیش بیانبێت ، ئه‌مانێش بۆ خۆیان ماندێلایکن . . .

 

دو جۆره که‌سایه‌تی هه‌ن …

نویسنده:
۱۰ آذر ۹۶

دو جۆره که‌سایه‌تی هه‌ن که حه‌ز ناکه‌م هیچ کات له گه‌ڵیان دانیشم و قسه‌یان له گه‌ڵا بکه‌م ؛
یه‌که‌م : که‌سانێک هه‌ن له سه‌رده‌مێکا شتێکیان بیستووه و له‌و ئایدا و باوه‌ڕه‌دا دوگم بوونه . ئیتر وا ئه‌زانن ئه‌و باوه‌ڕو ئایدایه ، تا هه‌تا هه‌تایه ڕاسته‌و کامڵه ! ئیتر تۆ ناتووانی له سه‌ر بیر و باوه‌ڕیان قسه بکه‌یت و هێڵه سووره‌که‌یان تێپه‌ڕێنیت !!!
دووه‌م : که‌سانێک هه‌ن که چووار کتێبیان خوێندۆته‌وه‌ و رێشیان به مۆدێلی ڕۆژ تاشیوه‌و ئیتر وا ئه‌زانن که ڕوناکبیرن‌ . جا به هه‌ر که‌س و هه‌ر چی و هه‌ر ئه‌ندێشه‌یک ئه‌گه‌ن به بێ سێ و دوو ، تێی ئه‌کوتن و ڕه‌تی ئه‌که‌نه‌وه !!!

شیرین و ناشیرین

نویسنده:
۲۶ اسفند ۹۵

سالانی زوو که هێشتا ته‌کنه‌لۆژیا به‌م ئاسته‌ی ئێستا پێش نه‌چوو بوو ، له هه‌ڵبژاردنه‌کانا وێنه‌ی ڕه‌ش و سپی کاندیداکان به دیوار و کۆڵان و شه‌قامه‌کانی شارا هه‌ڵ ئه‌واسرا . به‌ڵام به پێش وه‌چوونی ته‌کنه‌لۆژیا ، به تایبه‌ت عکاسی و فۆتۆشاپ و … زۆر شتی‌تر ، دۆخه‌که زۆر گۆڕا ! ڕواڵه‌تی ناشیرین و زه‌ق به فۆتۆ شاپ گۆڕانیان به سه‌ردا دێت و وێنه‌گه‌لێکی جووان و دڵ‌ڕفێن دروست ئه‌کرێت !

له‌ کاتی پڕوپاگه‌نده‌ی کاندیداکانی شوورای شاری مه‌ریوانا ، ناوه‌کان زۆر بۆم ئاشنا بوون . به‌ڵام وێنه‌کان نا !!! زۆربه‌یانم ئه‌ناسی ، ڕوومه‌تی زۆریانم له نزیکه‌وه بینیبوو ، له گه‌ڵیان قسه‌م کردبوو ، … به‌ڵام ئه‌و ڕوومه‌ته‌ی من له جیهانی واقیع و حازردا بینیومه ، زۆر جیاوازی بوو له گه‌ڵ وێنه‌ی هه‌ڵواسراوی کاندیده‌کانا ! کاندیدی وا بوو ( جا چه ژن بێت یان پیاو ! ) پیاو تێر نابێ له  سه‌یری چاو و ده‌م و لووت و زوڵفی خاو و قه‌د و باڵایان ! به‌‌ڵام له واقێعدا هه‌تا خوا حه‌ز کات ناشیرینن !

من به داخم بۆ ئه‌و خه‌ڵکه‌ی وا به پێی جووانی و ناشیرینی کاندیده‌کان ، ده‌نگیان پێ ئه‌ده‌ن ! دوو هێنده‌ش به داخم بۆ ئه‌و کاندیدانه وا ئه‌یانه‌وێت به وێنه‌ی فۆتۆشاپ‌کراو ، ده‌نگی خه‌ڵک به ده‌س بێنن !

میلله‌تێکی سه‌یرین !

نویسنده:
۲ آبان ۹۳

■ ئێمه میلله‌تێکی زۆر سه‌یرین ! به ڕۆژ دێینه سه‌ر شه‌قام و پشتگیری له کۆبانێ ئه‌که‌ین و هه‌ر چی تف و له‌عنه‌ت شک ئه‌به‌ین ئه‌یده‌ین به ناو چاوی ئه‌ردۆغانا ! پاشان که دڵمان ئارامی گرت ، ئیتر هه‌ست به برسیه‌تی ئه‌که‌ین و ئه‌چینه ” ترک دنر ” نانی نیوه‌ڕۆمان ئه‌خۆین ! به ده‌م چوونه ماڵیشه‌وه له ” قنادی آذربایجان ” دا بۆ میوانیه‌که‌‌ی شه‌ومان شیرینی ئه‌سێنین و یه‌ک سه‌عاتیش له سه‌فی ” بستنی نعمت ” دا سه‌رقاڵی گێڕانه‌و‌‌ه‌ی حه‌ماسه‌ته‌که‌ی ئه‌و ڕۆژه ئه‌بین !

■■ ئێمه میلله‌تێکی زۆر سه‌یرین ! به شه‌و به دیار کاناڵه‌کانه‌وه دائه‌نیشین ، هه‌تا باسی حه‌ماسه‌تی ئه‌و ڕۆژه‌مان بۆ بگێڕنه‌وه . پاشان به دڵێکی پڕ له غروره‌وه ، وه‌ک کوردێکی ته‌واو شانی لێ شل ئه‌که‌ین و هه‌تا نیوه‌شه‌و ، به ته‌ماشا کردنی سریاڵی تورکی و … ماندوویه‌تیمان ئه‌حه‌سێته‌وه !

ئه‌وه‌ی ئه‌کوژرێت کورده ، ئه‌وه‌یش وا ئه‌کوژێت هه‌ر کورده !

نویسنده:
۲۲ مهر ۹۳

” حزب الله ” ی کوردی ، ساڵی ۱۹۷۹ له شاری باتمان ، له لایه‌ن ” حسین ولی‌اغلو ” وه دامزرا . لێره نامه‌وێ له سه‌ر مێژوی ئه‌م ڕێکخراوه قسه بکه‌م . ته‌نیا ئه‌وه‌تان به بیر دێنمه‌وه که ئه‌م ڕێکخراوه ، گروپێکی جیهادیه و له سه‌ره‌تای دامه‌زراندنیه‌وه تا کۆتایی ساڵانی ۹۰ دژ به پ ک ک له چالاکیا بووه . دوا به دوای چه‌ندین کاری تیرۆریستی ، له ساڵی ۲۰۰۰ ، ولی‌اغلو له شاری ئه‌سته‌مبوڵ کوژرا و نزیک به ۱۰۰۰ که‌س له لاینگرانی ده‌ستگیر کران . نزیک به ۹۰ له ۱۰۰ ی لاینگر و ئه‌ندامانی ئه‌م ڕێکخراوه به داخه‌وه کوردن . له کاتی دامه‌زراندنیه‌وه تا ئیستا ، پێچه‌وانه‌ی پانتایی سیاسی تورکیه ، که بوونێکی زه‌ق و به‌ر چاویان نه‌بووه ، له نێو کۆمه‌ڵگای کوردی باکوور ، بونی ڕۆحی‌یان بووه‌و هه‌یانه . ڕژیمه یه‌ک له دوای یه‌که‌‌‌کانی تورکیه‌ش ، له سه‌رده‌می سکۆلاره‌کانه‌وه ، هه‌تا سه‌رده‌می ئیخوانه‌کان ، حه‌زیان له چاره‌ی حزب الله نه‌کردووه . به‌ڵام ئه‌م ڕیکخراوه توندڕه‌وه‌یان له ژێر سایه‌ی ڕه‌حمه‌تی خۆیانا بۆ کاتی ته‌نگانه پاراستووه و نه‌یان هێشتووه له ناو بچێت ! ئه‌ویش ته‌نیا و ته‌نیا له به‌ر لاواز کردنی بزوتنه‌وه‌ی کوردی بووه له باکوور ، که پ ک ک ڕابه‌رایه‌تی ئه‌کات . به‌ڵگه‌ش بۆ ئه‌مه شکستی ” ده‌میرتاش ” ه له هه‌ڵبژاردنه‌کانی سه‌رۆکایه‌تی تورکیه ، که ته‌نیا ۱۰ له ۱۰۰ ی ده‌نگه‌کانی به ده‌ست هێنا ! ئه‌مه نیشان له پلانێکی به هێزه بۆ دزه پێ کردنی ئایدۆلۆژیای ئیخوان و ” گویله‌ن ” و ” حزب الله “‌ی کوردی بۆ نێو بیر و هزری کوردی باکور ، تا وا تێ بگه‌ن که به‌رهه‌ڵستی کردنی پ ک ک و ب د پ و هه‌ر هێزێکی کوردی که دژ به ئانکارا بێت نیشان له دینداری و موسڵمانه‌تیه ! هۆکاره‌کانی ئه‌م دزه کردنه‌ش زۆرن ، ڕه‌نگه یه‌کێ له هۆکاره‌کان مانیفێستی چه‌پ و شێوه خه‌باتی پ ک ک بێت ، یان هه‌ڵه‌گه‌لێکی مێژوویی که بۆی هه‌یه هه‌ر ڕێکخراوێک له ته‌مه‌نی خۆیا کردبێتی . به‌ڵام هیچ کام له‌مانه ناتوانێت ئه‌وه بشارێته‌وه که به داخه‌وه کوردی باکوور به ناوی دینه‌وه دوچاری دوگمێکی ئایینی بووه و له دوگماتیزمی دینی ئه‌وه‌نده غه‌رقه ، که بوونی خۆی فیدای ئایدۆلۆژیای ئیخوان و ئه‌ردۆغان ئه‌کات . ئه‌م دوگم بوونه‌ش وای کردووه که ئیخوانه‌کانی رۆژهه‌ڵات و باشووریش ته‌نیا و ته‌نیا له به‌ر ئه‌وه‌ی که هاو فکری حزبه‌که‌ی ئه‌ردۆغانن ، چاو به سه‌ر فاشیست بوونی حکومه‌ت و ده‌وڵه‌تی تورکیه ببه‌ستن و وه‌ک پاشکۆیکی ئیخوانه‌کانی تورکیه به شانازیه‌وه به شان و باڵیانا هه‌ڵ بده‌ن‌‌و خۆیان له ڕه‌گه‌ز په‌ره‌ستی و فاشیست بوونی ده‌سه‌ڵاتدارانی تورکیه گێل بکه‌ن .

دوا به دوای شه‌هید بوونی زیاتر له ۳۵ که‌س له شاره‌کانی باکوری کوردستانا ، ئه‌ردۆغان ئه‌ڵێ :” ئه‌وه‌ی ئه‌کوژرێت کورده ، ئه‌وه‌یش وا ئه‌کوژێت هه‌ر کورده “

منیش له گه‌ڵی هاوڕام ؛ ئه‌وه‌ی وا ئه‌کوژێت ، لاینگرانی گویله‌ن و حزب الله ی کوردی و ئیخوانه‌کان و ئه‌وه‌ی وا ئه‌کوژرێتیش ڕه‌نگه کوڕی ماڵی هاوسێ‌یکی لاینگری گویله‌ن و حزب الله‌ی کوردی و ئیخوانه‌کان بێت !

ئه‌ردۆغان خۆی به زمانی خۆی مانیفێستی خۆی ئاشکرا ئه‌کات ؛ کوشتنی کورد به ده‌ستی کورد! ….